Kandidati për kryetar komune në Çair nga koalicioni Vlen dhe një prej liderëve të këtij blloku politik, Izet Mexhiti, ka reaguar ndaj liderit të BDI-së, Ali Ahmeti, se po përdor retorikë luftarake për të defokusuar opinionin dhe për të mbrojtur figurat e përfshira në skandale.
“Nuk është për t’u çuditur. Sa më shumë zbardhen aferat korruptive, angazhimi i tij për shpëtimin e Gruevskit e Mijallkovit e sidomos investimi politik për ta futur “botën serbe” në Maqedoni, aq më e zjarrtë do të bëhet retorika e “xhaxhit””, shkroi Mexhiti në faqen e tij zyrtare në rrjetin social Facebook.
Ai shtoi se vizitat nëpër shtëpitë e politikanëve maqedonas dhe kërcënimet me destabilizim janë shenja të hallit të madh të BDI-së, që sipas tij, po përpiqet të mbulojë përgjegjësinë për korrupsionin përmes nxitjes së tensioneve ndëretnike.
“Vizitat nëpër shtëpitë e politikanëve maqedonas dhe kërcënimet me destabilizim ndodhin nga ndonjë hall i madh, zakonisht kur politikanët opozitarë luftojnë për të shpëtuar nga përgjegjësia për aferat korruptive. Koha kur tensionet ndëretnike shërbenin si mbulesë për korrupsionin ka përfunduar. Koha e përgjegjësisë po afron”, potencoi Mexhiti.
