Një zhvillim i shumëpritur po ndodh në Spitalin Klinik të Tetovës: 155 punonjës shëndetësorë që prej vitesh shërbenin pa kontrata të rregullta pune, po bëhen zyrtarisht pjesë e institucionit. Lajmin e ka bërë të ditur zëvendëskryeministri Izet Mexhiti përmes një njoftimi në rrjetet sociale.
“Sot është një ditë drejtësie dhe dinjiteti për profesionistët tanë të shëndetësisë. Ata që për vite punuan me përkushtim pa marrë vendimet që u takonin, sot më në fund po marrin sigurinë e vendit të punës dhe njohjen e merituar,” theksoi Mexhiti.
Ai shtoi se ky është një hap konkret drejt drejtësisë sociale dhe ndërtimit të institucioneve më të forta dhe të barabarta për të gjithë. Sipas tij, punonjësit shëndetësorë nuk do të jenë më të nënçmuar apo të shfrytëzuar.
“Kjo është qeverisja që vepron – me përgjegjësi, me drejtësi dhe me respekt për çdo profesionist e për familjet e tyre. Sepse ky institucion VLEN,” përfundoi Mexhiti, duke uruar të gjithë punonjësit për këtë moment të rëndësishëm.
Burimi: alfax.mk
