Memorial për 4 viktimat e ngjarjeve të Bit Pazarit, Ganiu: Pas 33 vitesh përkujtohen ata që dhanë jetën për barazi

Familjarët e 4 viktimave të protestave të Nëntorit të vitit 1992 së bashku me autoritet shpalosën një pllakë memoriale te ura e “Bit Pazarit” në Çair.

Të pranishëm kishte edhe persona që morën pjesë në atë protestë, por edhe familjarë të të mbijetuarve nga represioni policor ndaj protestuesve.

“Ngjarja tragjike e 6-7 Nëntorit 1992 ku qytetarë të pafajshëm u vranë, u plagosen dhe u torturuan në mënyrë ç’njerzore, përbëjnë një plagë të pashëruar për shoqërinë tonë.

Ajo që ndodhi atë ditë mbetet një episod i rëndë dhe i debatueshëm në historinë tonë moderne për të cilën faktet arkivore dhe dëshmitë që pritet të publikohen në një vepër studimore të veçantë do të ndihmojnë në një kuptim më të thellë dhe objektiv të së vërtetës”, tha Visar Ganiu, kryetar i Komunës së Çairit.