Kryetari i PDK-së Memli Krasniqi një ditë para balotazhit ka thënë se qytetarët të dielën më 9 nëntor duhet të votojnë për fitoren e kandidatëve të kësaj partie, pasi vetëm kështu do të mund të arrijë ndryshimi i shumëpritur për qytetet dhe Kosovën.
“Nesër është dita jonë. Dita e PDK-së. Dita kur çdo qytetar, me votën e tij, do të përcaktojë fitoren tonë – si fitore për qytetin e tij. Sepse vetëm 24 orë na ndajnë: nga Prizreni që punon, nga Mitrovica që beson, nga Vushtrria që ec përpara, nga Kaçaniku që nuk thyhet, nga Klina e Dragashi që nuk dorëzohen.
Nesër votojmë për Shaqën, Arianin, Feritin, Sabedinin, Sokolin dhe Shabanin, për njerëzit që e dëshmojnë çdo ditë se lidershipi është shërbim, jo privilegj.
Këto 24 orë janë gjithçka që kemi. Dhe çdo votë është një hap më afër fitores. Sepse kur t’i mbledhim të gjitha bashkë, do ta bëjmë dallimin dhe ndryshimin që kemi nevojë për katër vitet e ardhshme. Së bashku. Ma mirë për qytetet tona. Ma mirë për Kosovën”, ka shkruar Krasniqi në Facebook.
PDK në raundin e dytë do të kërkojë fitore në gjashtë komuna.
Burimi: botasot.info
