Mehani akuzon qeverisjen në Skenderaj për “abuzim me pronat komunale”, e fton Lushtakun në ballafaqim

Hysni Mehani, kandidat i Vetëvendosjes për kryetar të Skenderajt, ka akuzuar qeverisjen komunale për abuzim me prona komunale.

Madje ai ka thënë se pyetja shtrohet edhe “se a ka mbetur ndonjë pronë pa uzurpuar”.

Mehani në emisionin “Këndi i Debatit” ka thënë se rasti i pronës së tregut në këtë komunë shpërfaq më së miri nivelin e abuzimit me pronat komunale.

Ai ka thënë se për këto është i gatshëm të ballafaqohet me kandidatin e PDK-së, Sami Lushtakun.

“E ftoj me u ballafaquar z. Lushtakun le ta zgjedh televizionin dhe gazetarin. Kur po themi për pronat që janë uzurpua, shtrohet pyetja edhe sa kanë mbetur pa uzurpuar, duke përfshirë edhe këtë të tregut në vlerë 2 milionë euro. Është rasti më eklatant që e shpërfaq nivelin e abuzimit me pronat komunale në Skenderaj. Rastin e kam dërguar në Prokurorinë Speciale dhe është e habitshme që ende nuk më ka ftuar. Prona komunale ku të jepet duhet mi shërbyer interesit publik jo disa individëve që dihen me emër e mbiemër”, ka thënë Mehani.