Më shumë se gjysma e evropianëve mbështesin zgjerimin e Bashkimit Evropian

56

Shkup, 28 tetor – Më shumë se gjysma e qytetarëve të Bashkimit Evropian (56 përqind) mbështesin idenë e zgjerimit të BE-së, sipas të dhënave më të fundit nga Eurobarometri.

Mbështetja më e lartë është regjistruar në Suedi (79%), Danimarkë (75%) dhe Lituani (74%), ndërsa mbështetja më e ulët është në Austri (45%), Çeki (43%) dhe Francë (43%).

Të rinjtë evropianë janë mbështetësit më të mëdhenj – 67% e të anketuarve në moshën 15 deri 24 vjeç mbështesin pranimin e vendeve të reja, ndërsa te grupmosha 25–39 vjeç ky përqindje është 63%.

“Mbështetja vjen kryesisht nga të rinjtë dhe qytetarët me arsim të lartë, gjë që nuk është befasuese – ata janë njerëz më të hapur dhe me kuptim për iniciativa të tilla,” deklaroi Corina Stratulat, zëvendësdrejtore e Qendrës Politike Evropiane.

Hulumtimi tregon se 37% e qytetarëve besojnë se zgjerimi do të forcojë ndikimin e BE-së në botë, po aq mendojnë se do të forcojë tregun evropian, ndërsa 30% presin më shumë solidaritet mes vendeve anëtare.

Megjithatë, 40% e të anketuarve shprehin shqetësim për mundësinë e migracionit të pakontrolluar, 39% për rreziqet nga korrupsioni dhe krimi, dhe 37% për shpenzime shtesë për tatimpaguesit.

Sipas Eurobarometrit, 44% e qytetarëve mendojnë se zgjerimi duhet të shoqërohet me masa për sundimin e ligjit dhe luftën kundër korrupsionit, ndërsa 38% kërkojnë që vendet kandidate të marrin angazhime të qarta për zbatimin e reformave evropiane.

“Do të ishte mirë që politikanët ta shfrytëzojnë këtë valë të mbështetjes publike për të qenë më ambiciozë dhe për të përshpejtuar përgatitjet për pranimin e vendeve të reja,” theksoi Stratulat.