Në fshatin Gjonaj të Hasit, iu dha lamtumira e fundit veteranit të Ushtrisë Çlirimtare të Kosovës, Lumni Lushaj, i cili humbi jetën të martën në një aksident në autostradën “Ibrahim Rugova”.
Para ceremonisë së varrimit, në shtëpinë e kulturës “Reshat Çoçaj” u mbajtën homazhe para trupit të pajetë të veteranit, si dhe një akademi komemorative ku morën pjesë familjarë, miq, bashkëluftëtarë dhe përfaqësues të institucioneve lokale e qendrore.
Kryetari i Prizrenit, Shaqir Totaj, ka theksuar se Lumni Lushaj ishte një person me energji të jashtëzakonshme/ Sipas tij, komuniteti ka humbur një njeri të çmuar.
Ndërkaq, kryetari i degës së OVL-UÇK-së, Isa Berisha, ka thënë se me vdekjen e Lushajt është humbur një humanist dhe njeri me vlera të larta kombëtare.
Bashkëveprimtari Ferhat Shala ka folur për kontributin e tij në periudha të ndryshme, duke e përshkruar Lushajn si bashkëluftëtar dhe bashkëpunëtor të Kadri Veselit dhe Hashim Thaçit.
Mes emocioneve të forta, vajza e të ndjerit, Diellza, si dhe vëllai Shaqa, falënderuan të pranishmit për nderimin dhe përkrahjen, duke e kujtuar të ndjerin si njeri humanist dhe mbi të gjitha si familjar shembullor.
Pas akademisë komemorative, u mbajt ceremonia e varrimit. Trupi i pajetë i Lushajt u bart nga ushtarët e FSK-së.
Burimi: botasot.info
