“Më mirë sot se nesër”: Rrustem Mustafa rikthen idenë e bashkëpunimit PDK–VV

Deputeti i Partisë Demokratike të Kosovës, Rrustem Mustafa, ka ritheksuar në Kuvend nevojën për një marrëveshje politike ndërmjet PDK-së dhe Lëvizjes Vetëvendosje. Ai e ka cilësuar një marrëveshje të tillë si “koalicion për shtet”.

Në deklarimet jashtë rendit të ditës në seancën e së enjtes, Mustafa tha se tri palë zgjedhje brenda gjashtëmbëdhjetë muajve, bllokadat institucionale dhe përplasjet e vazhdueshme politike kanë marrë kohë dhe energji që duhej t’i kushtoheshin zhvillimit të vendit. “Më mirë sot se nesër”, tha ai.

Sipas Mustafës, institucionet sot janë funksionale, por sfidat nuk kanë përfunduar. Ai shtroi pyetjen nëse dallimet partiake duhet ta pengojnë bashkëpunimin për interesat e Republikës.

“E di se ka kundërshtime”

Mustafa pranoi se propozimi i tij has në kundërshtime. Ai përmendi ata që vlerësojnë se një koalicion i tillë do t’ia zgjaste mandatin politik kryeministrit Albin Kurti dhe se ky i fundit duhet të përballet me sfidën e zgjedhjeve. Mustafa tha se e respekton edhe këtë qëndrim.

Sipas tij, çdo marrëveshje duhet të ketë objektiva të qarta, përgjegjësi dhe rezultate të matshme. Ai kërkoi që të diskutohet nëse ekzistojnë interesa madhore për të cilat dy partitë mund të marrin përgjegjësi së bashku.

Ide e hershme e Mustafës

Nuk është hera e parë që Mustafa e ngre këtë propozim. Në shtator ai kishte publikuar një platformë për “Koalicion për Normalitet” mes LVV-së, PDK-së dhe komuniteteve joshumicë, dhe kishte thënë se ishte takuar me Kurtin për ta diskutuar atë.

Deklarata e tij vjen në një periudhë kur PDK-ja drejtohet nga ushtruesja e detyrës, Vlora Çitaku, pas dorëheqjes së Bedri Hamzës. Ajo vjen edhe në ditët kur PDK-ja dhe Vetëvendosja kanë zhvilluar bisedime për mënyrën e trajtimit të Ligjit për Dhomat e Specializuara, i cili pritet të votohet sot në Kuvend.