Mbilleni tani këtë lule të mrekullueshme – në pranverë kopshti juaj do të rrezatojë ngjyra e jetë!

Tulipanët mbillen në vjeshtë sepse zhardhokët e tyre duhet të kalojnë një fazë të ftohtë për të lulëzuar më vonë. Nëse gjithçka bëhet siç duhet, kopshti juaj në pranverë do të shpërthejë në ngjyra dhe jetë

Këto ditë nëntori janë momenti ideal për disa punë të vogla në kopshtin tuaj dhe, pse jo, për të mbjellë edhe ndonjë lule shtesë. Në fund të fundit, lule kurrë s’ka shumë!

Nëse keni vazo në kopsht, kujdesuni që t’i ngrini pak mbi tokë për të shmangur grumbullimin e ujit. Pastrimi i gjetheve jo vetëm që e bën kopshtin më të rregullt, por është edhe një ushtrim i mirë fizik. Dhe ka një detyrë të fundit për nëntorin, përpara se të fillojnë shirat dhe erërat: a i doni tulipanët?

Nëse po, shkoni menjëherë në qendrën e bimëve për të blerë zhardhokët. Tulipanët duhet të mbillen në vjeshtë, nëse nuk e keni bërë në tetor, ende keni kohë. Zhardhokët duhet të kalojnë një periudhë të ftohtë, të lagësht dhe të errët gjatë muajve të vjeshtës dhe dimrit, në mënyrë që të rrënjosen dhe të formojnë sythat. Temperatura ideale është rreth 15°C, pra, koha është tani!

Një kopsht ëndrrash, plot jetë, magji dhe ngjyra, një përjetim estetik për të gjitha shqisat. Nëse ende nuk i keni, shtoni tulipanët në historinë tuaj të kopshtit, lule madhështore që i japin hijeshi, finesë dhe një prekje “holandeze” hapësirës suaj, transmeton Telegrafi.

Si të mbillni tulipanët?

Zgjidhni një vend me diell ku uji nuk grumbullohet (toka duhet të jetë e drenazhuar mirë që rrënjët të mos kalben). Hapni vrima rreth 15 cm të thella, shtoni pak rërë ose zhavorr të imët, vendosni zhardhokët, mbulojini mirë dhe ujiteni tokën. Dhe kaq, në pranverë do t’ju presë një spektakël me ngjyra!

Këshillë shtesë: Hortikulturistët rekomandojnë t’i mbillni zhardhokët në grupe prej pesë ose shtatë për një pamje më natyrale. Mos i hiqni gjethet menjëherë pas lulëzimit, ato ushqejnë zhardhokun për sezonin e ardhshëm.