Të dhënat e Drejtorisë së Doganave tregojnë se në dhjetë vitet e fundit, mbi 80% e automjeteve të importuara në Maqedoninë e Veriut, janë të përdorura, përcjell TV21. Në të njëjtën kohë, numri i automjeteve të regjistruara është dyfishuar – nga 350 mijë në vitin 2012 në gati 700 mijë në vitin 2024, por edhe pse kështu, mosha mesatare e automjeteve ka shkuar në 19.4 vjet, që do të thotë se në rrugë lëvizin gjithnjë e më shumë automjete të vjetra.
Në Shkup është regjistruar çdo automjet i tretë në vend, me mbi 33% të makinave dhe 38% të automjeteve të transportit të mallrave. Dominojnë automjetet me naftë me 63%, benzina ka rënë në 26%, ndërsa automjetet elektrike dhe hibride po shënojnë rritje të shpejtë – vetëm vitin e kaluar +169% për automjetet elektrike dhe +295% për ato hibride.
Të dhënat e importit të automjeteve
Në vend gjatë vitit janë importuar gjithsej 62,069 automjete, prej të cilave 53,867 janë automjete pasagjerësh.
Për çdo automjet të ri të importuar, mesatarisht janë importuar 3.5 automjete të përdorura. Në 11 muajt e parë të vitit janë importuar gjithsej 12,025 automjete të reja dhe 41,842 të përdorura.
Në importin e automjeteve të transportit, këtë vit janë importuar më shumë automjete të reja – 4,408 krahasuar me 3,502 të përdorura, ndërsa autobusët dhe minibuset e reja janë importuar vetëm 13, krahasuar me 278 të përdorura.
Që nga viti 2009, janë importuar gjithsej 631,574 automjete pasagjerësh, prej të cilave mbi 81% ose 515,856 janë të përdorura, dhe vetëm 115,718 janë të reja.
Importi i automjeteve të reja vetëm vitin e kaluar për herë të parë tejkaloi numrin e importit të automjeteve të reja në vitin 2009, kur ishin importuar 10,574 automjete të reja krahasuar me 2,944 të përdorura.
Llojet e karburantit
Nga 684,417 automjete të regjistruara në 2024, 580,210 janë pasagjerësh. Rreth dy të tretat janë me naftë, 25% benzinë dhe 1% hibride ose elektrike.
Në 2024 kishte 365,947 dizel, 150,439 benzinë, 5,078 hibride dhe 1,507 elektrike.
Nafta dominon automjetet pasagjerësh me rritje mbi 12% vjetore gjatë dhjetë viteve të fundit, benzina ka rënë mesatarisht −2.32% në vit, ndërsa automjetet elektrike dhe hibride shënojnë rritje të lartë relative.
Rritja e automjeteve elektrike ishte 169%, ndërsa e hibrideve 295%. Në 2024 ishin regjistruar 1,507 elektrike dhe 5,078 hibride, ndërsa në 2023 561 elektrike dhe 1,287 hibride.
Nga viti 2014, automjetet me benzinë kanë rënë nga 215,175 (58%) në 150,439 (rreth 26%) në 2024. Nafta është rritur nga 145,065 (39%) në 365,947 (63%).
