SHBA-të rritën presionin ndaj Venezuelës dhe presidentit Nicolas Maduro duke dërguar një tjetër anije luftarake në kryeqytetin e Trinidadit dhe Tobagos, Porti i Spanjës.
Shkatërruesi i Marinës Amerikane USS Gravely u ankorua në port dhe do të qëndrojë nga data 26 deri më 30 tetor. Ambasada e SHBA-ve në Trinidad dhe Tobago njoftoi se qëllimi është bashkëpunimi mes dy vendeve në fushën e sigurisë.
Ndërkohë, Venezuela ka dënuar ashpër ankorimin e anijes amerikane, duke e cilësuar si një provokim ushtarak të organizuar në bashkëpunim me Agjencinë Qendrore të Inteligjencës së SHBA-ve.
Sipas autoriteteve venezueliane, gjatë stërvitjeve janë kapur disa mercenarë, të cilët dyshohet se kishin lidhje me shërbimet amerikane të inteligjencës dhe synonin të kryenin një sulm që më pas do t’i faturohej Venezuelës.
Presidenti Nicolás Maduro ka akuzuar më herët Uashingtonin për plane të ngjashme, përfshirë edhe një sulm të mundshëm me eksplozivë ndaj ambasadës amerikane në Caracas në fillim të tetorit.
Sipas Pentagonit, prania ushtarake amerikane në Karaibe është pjesë e luftës kundër trafikut të drogës, ndërsa të premten, në rajon është dislokuar edhe grupi i aeroplanmbajtëses “Gerald Ford.”
Burimi: botasot.info
