Shtetet e Bashkuara të Amerikës kanë dërguar pesë avionë luftarakë F-35 në Porto Riko, me qëllimin zyrtar të forcimit të operacioneve kundër trafikut të drogës dhe karteleve që veprojnë në Karaibe.
Agjencia Reuters shkruan se pesë avionë luftarakë F-35 të Forcave Ajrore Amerikane zbarkuan në Porto Riko të shtunën, disa ditë pasi Presidenti Donald Trump urdhëroi vendosjen e 10 avionëve luftarakë të fshehtë në territorin e Karaibeve, informon
F -35 zbarkuan në ish-bazën ushtarake Roosevelt Roads në Ceiba, Porto Riko. Helikopterë ushtarakë dhe avionë Osprey janë parë gjithashtu në zonë ditët e fundit.
I pyetur në lidhje me avionët, një zyrtar i Pentagonit tha:
“Nuk kemi asnjë ndryshim në qëndrimin tonë ushtarak për të njoftuar në këtë kohë”.
Ky zhvillim erdhi disa ditë pasi Presidenti Donald Trump urdhëroi vendosjen e 10 avionëve luftarakë të fshehtë në këtë rajon në Karaibe për të forcuar operacionet kundër karteleve të drogës dhe mes përshkallëzimit të vazhdueshëm të tensioneve me Venezuelën.
Javën e kaluar, forcat e armatosura amerikane sulmuan një motoskaf që dyshohet se mbante drogë, duke vrarë 11 persona në bord, të cilët u përshkruan si anëtarë të bandës Tren de Aragua, një pretendim i mohuar nga Karakasi, i cili tha se asnjë nga 11 personat e vrarë nuk ishin trafikantë droge.
Të shtunën, qeveria venezueliane denoncoi ndalimin e paligjshëm të një anijeje peshkimi nga një anije luftarake amerikane.
Burimi: botasot.info
