Lladrovci mbledh partinë: Drenasi dëshmoi edhe një herë se është zemra e Kosovës

Kryetari i rizgjedhur i Komunës së Drenasit, Ramiz Lladrovci, ka mbajtur një takim me asamblistët e zgjedhur dhe kandidatët për Asamble nga lista fituese “Për Drenasin Kampion”, bashkë me Shefin e Shtabit Zgjedhor, Arben Shala.

Në këtë takim, Lladrovci i uroi të pranishmit për fitoren që e quajti “shembullore” dhe “fitore e qytetarëve kampionë të Drenasit”.

Postimi i plotë:

Bashkë me Shefin e Shtabit Zgjedhor, Arben Shala, mbajtëm takim me asamblistët e zgjedhur dhe kandidatët për Asamble të listës “Për Drenasin Kampion”.

Në takim i urova të pranishmit për fitoren tonë shembullore, fitoren e qytetarëve kampionë të Drenasit dhe i falënderova për angazhimin e jashtëzakonshëm dhe të sinqertë gjatë fushatës zgjedhore.

Asamblistët që kanë siguruar ulëse në Kuvendin e Komunës, me konsensus të plotë, vendosën që kandidati për Kryesues të Kuvendit Komunal të jetë Burim Bujupi, ndërsa Shef i Grupit Parlamentar u vendos të jetë asamblisti Gani Krasniqi.

Gjithashtu, pas numërimit të votave të pjesëmarrësve në votim, i urova asamblistët dhe kandidatët e Listës fituese për suksesin e arritur, të cilët do të jenë përfaqësues dinjitoz dhe me integritet në Kuvendin e Komunës.

Drenasi dëshmoi edhe një herë se është zemra e Kosovës, vazhdojmë me kandidatët kampionë, me qytetarët kampionë. Suksese!