Lirimi i të burgosurve politikë, Trump njofton anulimin e sulmit të dytë në Venezuelë: Qeveria ka bërë një gjest të mençur

Njoftimi u bë në një postim në Truth Social herët të premten, ku Trump vlerësoi veprimet e qeverisë në detyrë të Venezuelës.

Ishte hera e parë që presidenti amerikan përmendi mundësinë e një vale tjetër sulmesh në vend dhe kjo vjen gati një javë pasi ai urdhëroi një operacion ushtarak për të rrëzuar ish-presidentin venezuelian Nicolás Maduro, i cili aktualisht ndodhet në paraburgim në SHBA së bashku me bashkëshorten e tij, Cilia Flores.

Në postimin e tij në rrjetet sociale të premten herët, Trump tha se Venezuela po “lironte një numër të madh të të burgosurve politikë si shenjë e ‘kërkimit të paqes’”, duke shtuar: “Ky është një gjest shumë i rëndësishëm dhe i mençur.”

Venezuela filloi të enjten lirimin e të burgosurve me profil të lartë, përfshirë politikanë të opozitës, në një përpjekje për të “kërkuar paqen”, tha qeveria në detyrë.

Trump vijoi duke thënë se të dy vendet po “punojnë mirë së bashku, veçanërisht sa i përket rindërtimit, në një formë shumë më të madhe, më të mirë dhe më moderne, të infrastrukturës së tyre të naftës dhe gazit.”

“Për shkak të këtij bashkëpunimi, kam anuluar Valën e Dytë të Sulmeve, e cila pritej më herët dhe që duket se nuk do të jetë e nevojshme; megjithatë, të gjitha anijet do të qëndrojnë në pozicion për arsye sigurie,” shtoi ai.

Pas operacionit amerikan për të rrëzuar Maduron, Trump kishte thënë se SHBA-ja do ta “drejtonte” praktikisht vendin dhe nuk e kishte përjashtuar mundësinë e një përfshirjeje ushtarake afatgjatë.

Trump pritet gjithashtu të takohet të premten në Shtëpinë e Bardhë me drejtues të kompanive të mëdha të naftës, për t’i bindur ata të rrisin prodhimin e naftës në Venezuelë dhe të bëjnë investime të reja në vend.

Ai pretendoi se “të paktën 100 miliardë dollarë do të investohen nga NAFTA E MADHE”, por industria e naftës ka shprehur skepticizëm serioz për mundësinë e investimit të dhjetëra miliardë dollarëve gjatë një dekade për të rikthyer infrastrukturën e naftës në Venezuelë.

Top Channel