Ministrja Mimoza Kusari, gjatë vizitës zyrtare në Portugali, ka zhvilluar një takim në Parlamentin portugez me përfaqësues të Grupit të Miqësisë Portugali–Kosovë, ku është diskutuar për thellimin e bashkëpunimit politik, ekonomik dhe institucional ndërmjet dy vendeve, shkruan “Bota sot”.
Kusari ka bërë të ditur se në takim me kryetarin e Grupit të Miqësisë Portugali–Kosovë, Bruno Vitorino, si dhe deputetët Edite Estrela, Jose Dotti dhe Miguel Costa Matos, është diskutuar edhe për mbështetjen e Portugalisë në procesin e integrimit evropian të Kosovës.
Një ndër temat kryesore të takimit ishte mbështetja portugeze për anëtarësimin e Kosovës në organizatat dhe institucionet ndërkombëtare, përfshirë Këshillin e Evropës.
Postim i plotë:
Në kuadër të vizitës zyrtare në Portugali, sot zhvillova një takim në Parlamentin portugez me z. Bruno Vitorino, Kryetar i Grupit të Miqësisë Portugali–Kosovë, si dhe me deputetët Edite Estrela, Jose Dotti dhe Miguel Costa Matos.
Me grupin e miqësisë diskutuam për thellimin e bashkëpunimit ndërmjet dy vendeve, shkëmbimin e përvojave institucionale dhe mbështetjen e Portugalisë për integrimin evropian të Kosovës, për anëtarësimin në organizatat dhe institucionet ndërkombëtare, si dhe mbështetjen për anëtarësimin e Kosovës në Këshillin e Evropës.
Vëmendje të veçantë i kushtuam bashkëpunimit ekonomik, ku diskutuam për organizimin e Forumit të Biznesit Kosovë–Portugali në Prishtinë vitin e ardhshëm dhe nënshkrimin e një Marrëveshjeje Bilaterale për Bashkëpunim Ekonomik.
Gjithashtu, trajtuam rëndësinë e vendosjes së një linje të drejtpërdrejtë ajrore ndërmjet Kosovës dhe Portugalisë, e cila do të lehtësonte lidhjet ndërmjet dy vendeve dhe do të kontribonte në zhvillimin e turizmit. U theksua edhe rëndësia e zgjerimit të bashkëpunimit në fushën e industrisë së mbrojtjes dhe teknologjisë së informacionit.
Qëllimi është që këto iniciativa të afrojnë kompanitë portugeze me tregun dhe potencialin e Kosovës, ndërsa bizneseve kosovare t’u krijohen mundësi të reja për të depërtuar në tregun portugez.
Besojmë se Kosova dhe Portugalia kanë shumë për ti ofruar njëra-tjetrës dhe se forcimi i lidhjeve tona politike, institucionale dhe ekonomike do të hapë mundësi të reja për të dy vendet.
Burimi: botasot.info
