Kryetari i Komunës së Gostivarit, Vlabon Limani nga Aleanca për Shqiptarët, parti tashmë në koalicion me BDI-në, ka shprehur mirënjohje publike ndaj Qeverisë së udhëhequr nga VLEN, për mbështetjen e fuqishme që i është dhënë komunës së tij në kuadër të programit të projekteve kapitale.
Limani njoftoi se Gostivari ka përfituar plot 49 projekte nga kredia hungareze, pjesë e paketës prej 829 projekteve në total, me vlerë të përgjithshme rreth 15 miliardë denarë, që sot u zyrtarizuan me nënshkrimin e kontratave mes Qeverisë dhe komunave.
“Sot jam i gëzuar veçanërisht për një arritje që i dedikohet punës dhe përkushtimit të një ekipi, siç është ky i yni! Kam kënaqësinë të ndaj me ju lajmin e mrekullueshëm që pas aplikimit arritëm të fitojmë plot 49 projekte nga kredia hungareze. Kjo është dëshmi e një pune të ndershme dhe këmbëngulëse… Falënderoj gjithashtu edhe qeverinë e cila tregoi gatishmëri dhe korrektësi.”, shkruan Limani në postimin e tij.
