2
Ministri i Politikës Sociale, Demografisë dhe Rinisë, Fatmir Limani, ka bërë një apel publik drejtuar të gjithë shfrytëzuesve të ndihmës sociale dhe personave të papunë të evidentuar si kërkues aktivë të punës, që të aplikojnë në masën 6.2 të programit të punës publike, e cila ka për qëllim mbrojtjen nga zjarret dhe pyllëzimin.
Kjo thirrje publike parasheh angazhimin e 400 zjarrfikësve në të gjithë shtetin, ndërsa afati i fundit për aplikim është 23 korrik 2025.
Sipas ministrit Limani, përfshirja në këtë masë nuk e anulon të drejtën për ndihmë sociale, por përkundrazi, sjell të ardhura shtesë, përvojë pune, trajnim dhe certifikim profesional, si dhe përfshirje aktive në mbrojtjen e mjedisit jetësor.
Përfitimet nga masa përfshijnë: Pagesë mujore prej 24.000 denarësh. Sigurim në rast lëndimi në punë dhe sëmundje profesionale. Trajnim profesional për mbrojtje nga zjarret dhe pyllëzim. Certifikatë për njohuritë e fituara. Kontribut real në ruajtjen e natyrës dhe mjedisit.
Aplikimi bëhet në Qendrat për Punësim, çdo ditë pune prej orës 08:00 deri në 15:00, ndërsa më shumë informata mund të gjenden edhe në ueb-faqet e komunave përkatëse. “Mos e humbni këtë mundësi që sjell përfitime të dyfishta: ruani të drejtën për ndihmë sociale dhe fitoni të ardhura shtesë, përvojë dhe dinjitet”, theksoi ministri Limani në apelin e tij.
Burimi: zhurnal.mk
