Ish-kryetari i Degës së LDK-së në Gjermani, Oso Ferizi, i është drejtuar me një letër publike kryetarit të partisë, Lumir Abdixhiku, duke kërkuar përfshirjen në listën për deputetë të disa figurave që, sipas tij, kanë dhënë kontribut vendimtar për LDK-në dhe vendin gjatë tri dekadave të fundit.
Ferizi ka përmendur emra si Valon Murtezaj, Naser Rugova, Faton Bislimi, Fetah Rudi, Agim Veliu, Fadil Geci dhe Xhafer Tahiri, për të cilët thotë se rikthimi i tyre në listë do të ndihmonte në “maksimalizimin e votave të LDK-së, unifikimin e elektoratit dhe zvogëlimin e mospajtimeve të brendshme”.
Në letrën e tij, Ferizi thekson se këto figura kanë qenë pjesë e proceseve vendimtare për partinë dhe vendin dhe se LDK-ja duhet të mbështetet në “brumin e vet” për të siguruar fitore në zgjedhjet e ardhshme.
Letra e plotë:
LDK, do brumin e vetë, Fitore!
I nderuari kryetar z. Lumir Abdixhiku,
e nderuara Kryesi dhe Këshill Kombëtar i LDK-së,
Duke u nisur nga përgjegjësia jonë e përbashkët për forcimin e LDK-së dhe rritjen e besimit të elektoratit, më lejoni t’ju drejtohem me një thirrje dashamirëse që në listën për deputetë të përfshihen:
• Dr. Valon Murtezaj
• Dr. Naser Rugova
• Dr. Faton Bislimi
• Fetah Rudi
• Agim Veliu
• Fadil Geci
• Xhafer Tahiri
Këto figura për më shumë se tri dekada i kanë dhënë vlera, kontribut dhe energji LDK-së, duke qenë pjesë e proceseve vendimtare për partinë dhe vendin. Jam i bindur se përfshirja e tyre do të kontribuojë në maksimalizimin e votave të LDK-së, do të unifikojë elektoratin dhe do të zvogëlojë hapësirën për mospajtime të brendshme.
Me respekt,
Oso Ferizi
Ish-kryetar i Degës së LDK-së në Gjermani,04.12.2025
Burimi: botasot.info
