Pas rezultatit zhgënjyes të Lidhjes Demokratike të Kosovës në zgjedhjet e fundit, janë shtuar debatet dhe kritikat brenda e jashtë partisë për shkaqet që çuan në këtë dështim elektoral. Analistë, aktivistë dhe simpatizantë të LDK-së po ngrenë pikëpyetje serioze mbi funksionimin e brendshëm të subjektit, rolin e klaneve partiake dhe mungesën e një rifreskimi të thellë organizativ.
Në këtë kontekst, shtrohet dilema nëse LDK-ja ka nevojë për një çlirim nga ndikimet e brendapartiake dhe një reformim që të nisë nga degët e saj e deri në kryesi, duke ndarë qartë pushtetin lokal nga ai partiak, në mënyrë që sukseset në nivel komunal të reflektohen edhe në nivel qendror.
Saim Tahiraj, ish-bashkëluftëtar i heroit Sali Çekaj dhe veprimtar i LDK-së në Zvicër në një prononcim për gazetën “Bota sot” ka folur në lidhje me situatën aktuale brenda kësaj partie.
Sipas tij, historiku i LDK-së pas vdekjes së Presidentit Ibrahim Rugova është i dhimbshëm dhe tragjik, sepse pikërisht aty filloi rënia e saj.
“Rrugëtimi pas-rugovian i Lidhjes Demokratike të Kosovës është shoqëruar me gabime të rënda strategjike, organizative dhe ideologjike, të cilat e kanë dëmtuar thellë identitetin dhe besimin e elektoratit të saj tradicional.
Gjithçka nisi me të ashtuquajturin “Kuvendi i karrikave”, ku LDK-ja u nda në dysh — një akt fatal që shënoi fillimin e shkatërrimit të brendshëm dhe humbjes së autoritetit moral. Ajo ishte fatkeqësia politike nga e cila LDK-ja nuk arriti kurrë të rimëkëmbet plotësisht”, kujton Tahiraj.
Pas kësaj, ai thekson se pasuan koalicionet me PDK-në, të cilat rezultuan po aq shkatërruese.
“Elektorati i LDK-së jo vetëm që nuk i dëshironte këto koalicione, por i urrente skajshmërisht, për arsye të njohura tashmë: vrasjet politike, përplasjet ideologjike dhe antagonizmi i thellë moral mes dy subjekteve.
Gabimin e parë në këtë drejtim e bëri kryetari Fatmir Sejdiu, i cili mund të arsyetohet pjesërisht për shkak të rrethanave të shpalljes së pavarësisë. Mirëpo, në vend që të nxirreshin mësime nga ky gabim, udhëheqja e LDK-së vazhdoi në të njëjtën rrugë pa reflektim.
Isa Mustafa shkoi edhe më tej, duke e përsëritur të njëjtin gabim strategjik me PDK-në dhe duke bërë edhe gabime të tjera të rënda: anulimin e kuvendeve legjitime të degëve në mërgatë — një veprim fatal që e tundi rëndë strukturën dhe besimin. Si pasojë, LDK-ja u soll në një gjendje alarmante, duke rënë në 12%”. Pas zgjedhjeve të reja brenda LDK-së, u krijua shpresa se do të ndodhte rehabilitimi dhe një ngritje graduale. Por ndodhi e kundërta: rënia vazhdoi dhe rezultati u ngjit vetëm në 13%, pa asnjë rikthim real”, shprehet Tahiraj për “Bota sot”.
Një tjetër gabim i rëndë, sipas tij ishte largimi dhe anashkalimi i figurave autoritative, me kontribut dhe histori në LDK, dhe zëvendësimi i tyre siç shprehet ai “me satelitë të klaneve, njerëz pa asnjë ditë aktiviteti dhe sakrifice për LDK-në”.
“Madje, disa prej tyre kishin qenë kundërshtarë të hapur dhe propagandues të zhurmshëm kundër LDK-së, por u sollën në majën e piramidës së saj politike. Ky ishte një akt vetëshkatërrues.
Po aq i rrezikshëm ishte edhe koketimi me Islamin Politik, një devijim i rëndë ideologjik, kur dihet qartë orientimi perëndimor, liberal dhe pro-evropian i LDK-së, orientim që Presidenti Rugova e kishte betonuar përgjithmonë. Të gjitha këto gabime nuk duken të rastësishme. Përkundrazi, krijohet bindja se ato ishin pjesë e një plani të mirëkoordinuar nga qarqe të caktuara, të cilat kishin për mision shkatërrimin definitiv të LDK-së si forcë politike dhe morale”, thekson ai.
Për Saim Tahirajn, mbijetesa e LDK-së deri më sot i atribuohet ekskluzivisht elektoratit të saj idealist, i cili me një qëndresë stoike e mbrojti ekzistencën e saj në skenën politike të Kosovës, shpeshherë kundër vetë udhëheqjes së saj.
Për rrjedhojë, Tahiraj shprehet se sot, pas kësaj humbjeje drastike, LDK-ja ndodhet në një nga momentet më kritike të historisë së saj, ku secili duhet t’i marr përgjegjësitë që i takojnë.
“Kërkohet urtësi vepruese, analizë e thellë dhe debat i sinqertë për të gjitha gabimet e bëra që nga vdekja e Presidentit Rugova. Nga këto analiza duhet të dalin vendime të guximshme, pa ngritje tensionesh dhe pa lejuar një plasaritje të re brenda partisë.
Secili duhet të marrë përgjegjësinë që i takon, në bazë të funksionit që ka pasur, dhe të reflektojë me dorëheqje — duke filluar nga kryetari e tutje. I njëjti proces duhet të vazhdojë në të gjitha degët dhe nëndegët, duke hapur rrugë për personalitete me autoritet, integritet dhe kredibilitet, në të gjitha nivelet e LDK-së”, përfundon Tahiraj.
Ndryshe, Lidhja Demokratike e Kosovës deri më tash ka arritur të fitojë vetëm mbi 13 % të votave në zgjedhjet e 28 dhjetorit.
Burimi: botasot.info
