Publicisti Idriz Zeqiraj vlerëson se që nga krijimi i Qeverisë Kurti I, në opinion ka pasur skepticizëm dhe mosbesim, sidomos ndaj ministrave që vinin nga radhët e Lëvizjes Vetëvendosje, por sipas tij, ky perceptim u ndërtua mbi paragjykime dhe përfolje dashakeqe.
“Në opinion qarkullonin përfolje nga më të ndryshmet, duke u thënë se ‘këta nuk i ka uruar askush kurrë me punë të mbarë’ apo se ‘nuk kanë pasur as xhirollogari bankare të hapur’”, shprehet Zeqiraj.
Ai ngre pyetjen se ku do të mund të punësoheshin aktivistët e Vetëvendosjes, të cilët sipas tij, kishin kundërshtuar hapur pazaret politike me Serbinë, korrupsionin zyrtar, tenderët abuzivë dhe privatizimet e dëmshme për pasurinë publike.
Sipas Zeqirajt, dallimi kryesor i Albin Kurtit nga liderët e mëparshëm politikë është integriteti personal.
“Ministra të partive tjera shpesh imponoheshin përmes shantazhit, duke njohur aferat e shefave partiakë. Kjo nuk mund të ndodhë me Kurtin, sepse ai nuk ka mëkate dhe është i pashantazhueshëm”, thekson ai.
Publicisti vlerëson se Kurti vendosi një standard të ri në përzgjedhjen e kabinetit qeveritar, duke kujtuar se Vetëvendosje ka mbi 400 mijë votues, ndërsa qeverisë i nevojiten rreth 20 ministra.
“Risi e rëndësishme ishte edhe emërimi i profesionistëve jashtë partisë, të cilët u dëshmuan të suksesshëm në detyrat e tyre”, deklaron Zeqiraj.
Ai thotë se ndryshe nga Qeveritë Kurti I dhe II, të cilat udhëhiqeshin kryesisht nga ministra rishtarë, Qeveria Kurti III ka tashmë përvojë cilësore, gjë që sipas tij u konfirmua edhe nga fitorja e tretë radhazi e Vetëvendosjes me aleatët.
“Fitorja plebishitare e demanton bindshëm pretendimin se populli është mashtruar me votën e dhënë”, thotë Zeqiraj.
Duke veçuar disa nga figurat qeveritare, ai përmend Hekuran Muratin si reformator të spikatur në Financë, Xhelal Sveçlën për vendosjen e rendit dhe ligjit në veri, si dhe Donikë Gërvallën, për të cilën thotë se ka integritet dhe guxim intelektual, pavarësisht sulmeve politike ndaj saj.
Po ashtu, Zeqiraj vlerëson Ejup Maqedoncin në Mbrojtje, Arben Vitinë në Shëndetësi, Mimoza Kusari-Lilën për energjinë dhe përgatitjen e saj, si dhe Artane Rizvanollin për profesionalizmin në sektorin e energjisë.
Ai përmend edhe Armend Mujën, duke thënë se do të vazhdojë drejtimin e suksesshëm në Bujqësi, ndërsa për Nenad Rashiqin thekson se është ministër komunikues dhe i pranueshëm për të gjitha komunitetet.
“Prurjet e reja në Vetëvendosje janë intelektualë të formuar në universitete evropiane dhe botërore. Kuantiteti sjell edhe kualitetin, dhe mundësia e përzgjedhjes së kuadrove është gjithnjë e më e madhe”, përfundon Zeqiraj, duke uruar mbarësi për qeverinë dhe shtetin.
Burimi: botasot.info
