Kryetari i Lëvizjes Vetëvendosje, Albin Kurti pas takimit me paritë e tjera politike tha se në këtë takim ofroi dy kompromise, që nëse nuk votohet Albulena Haxhiu për kryetare të Kuvendit me votim të fshehtë ajo do të tërhiqet nga kandidatura.
Kompromisi tjetër nga kryeministri në detyrë të cilën ai e përmendi pas takimit me liderët e partive politike, ishte marrëveshja politike në pako për kryetarin dhe nënkryetarët të Kuvendit.
Kurti: Nëse Haxhiu nuk merr 61 vota, tërhiqet nga kandidatura
“Kam ofruar dy opsione në emër të Vetëvendosjes. Kompromisi ynë i parë është në rast të votimit të fshehtë nëse Haxhiu nuk merr 61 vota, tërhiqet nga kandidatura. Ajo nuk dëshiron që të votohet dy herë me votim të fshehtë. Me votim të fshehtë Albulena Haxhiu votohet vetëm një herë. Kompromisi i dytë që po ashtu e shpreha sot si opsion ishte që të bëjnë një marrëveshje politike – marrëveshje në paketë për kryetarin dhe nënkryetarët”, tha Kurti.
Sipas tij, PDK-ja dhe LDK-ja e kanë “keq lexuar” aktgjykimin e Kushtetueses dhe po e keqinterpretojnë në publik, raporton KosovaPress.
Ai tha se në aktvendimin e Kushtetueses nuk përmendet se komisioni për votim të fshehtë është antikushtetues.
Kurti: PDK dhe LDK e kanë keq lexuar aktgjykimin e Kushtetueses
“Partitë opozitare PDK dhe LDK e kanë keq lexuar aktgjykimin e Gjykatës Kushtetuese dhe po e keqinterpretojnë atë në publik. Nuk është as qëllim as kuptimi i atij aktgjykimi se çka po thuhet nga PDK e LDK-ja. Gjykata Kushtetuese nuk ka thënë se komisioni për votim të fshehtë është antikushtetues as që e ka shkelur Kushtetutën Avni Dehari…. Mbajtëm zgjedhjet, populli tha le të ndryshojë opozita se LVV është fituese e qartë. LVV është më e madhe se PDK e LDK së bashku… Është për mua e çuditshme se si nuk e kanë ndërmend të ndalin bojkotin e propozimeve tona – ata vazhdojmë të bojkotojnë çështjen e komisionit për votim të fshehtë”, tha Kurti.
Kryeministri në detyrë gjithashtu tha se edhe po të ketë takime të radhës ato nuk do të jenë më lajm.
Burimi: botasot.info
