Kryetari i Lëvizjes Vetëvendosje dhe Kryeministri në detyrë i Kosovës, Albin Kurti, ka marrë pjesë në punimet e Këshillit të Internacionales Socialiste, i cili u mbajt në Maltë, me pjesëmarrjen e liderëve nga mbarë bota.
Punimet nisën me takimin e Presidiumit të Internacionales Socialiste, ku Kurti, së bashku me kryeministra dhe liderë të partive socialdemokrate, socialiste e laburiste, diskutuan mbi sfidat globale që lidhen me paqen, demokracinë, drejtësinë sociale dhe ndryshimet klimatike.
Përveç pjesëmarrjes në Presidium, Kurti mbajti edhe një fjalim para delegacioneve ndërkombëtare, ku theksoi rëndësinë e të drejtave të njeriut, sundimit të ligjit dhe demokracisë funksionale.
Ai tha se në mandatin e tij lufta kundër korrupsionit ka qenë shtyllë kryesore, duke kontribuar në rritjen ekonomike, ndërsa politikat e rishpërndarjes kanë synuar zhvillim sa më gjithëpërfshirës.
Në këtë forum morën pjesë kryeministra dhe përfaqësues të lartë nga vende të ndryshme, përfshirë nikoqirin, Kryeministrin e Maltës Robert Abela, si dhe Kryeministrin e Spanjës dhe Kryetarin e Internacionales Socialiste, Pedro Sánchez.
Diskutimet u fokusuan në zhvillimet globale, sfidat në rajonin e Mesdheut dhe rolin e Internacionales Socialiste në promovimin e stabilitetit dhe paqes.
Burimi: botasot.info
