“Kurti bëri mirë që nuk e propozoi Osmanin për presidente, s’ka nevojë për të”

Profesori Basri Muja ka komentuar moskandidimin e Vjosa Osmani për një mandat të ri presidencial, duke thënë se kjo nuk ka qenë befasi dhe se kryeministri Albin Kurti ka vepruar drejt duke mos e propozuar atë.

Sipas Mujës, Osmani ishte zgjedhur presidente si rezultat i koalicionit politik me Kurtin dhe gjatë mandatit të saj kanë dhe dallime në qëndrime.

Ai tha se gjatë kësaj periudhe ka pasur edhe “dublifikime” në aktivitete, sidomos në arenën ndërkombëtare, si dhe sfida rreth çështjeve që, sipas tij, nuk kanë qenë drejtpërdrejt në kompetencat e presidencës.

“Jo për mua s’ka qenë befasi fare moskandidimi i Osmanit për presidente. Mendoj që Kurti ka bërë mirë që s’e ka propozuar për presidente. Së pari, ajo ka qenë pjesë e një koalicioni me Kurtin që si rezultat është zgjedh presidente për një mandat me pozitën më të lartë në vend. Ne e dimë që gjatë mandatit ka pasur fërkime të vazhdueshme, ka pasur dublifikime në aktivitete posaçërisht ndërkombëtare, ka pasur sfida brenda rreth pozitave dhe rreth çështjeve të cilat nuk kanë qenë fare në kompetencat e presidencës, por për një arsye apo tjetër i ka shfrytëzuar, ka pasur edhe favore. Por, mbi të gjitha Kurti i ka fituar mbi 50 për qind, nuk ka nevojë për Vjosa Osmanin, nuk është pjesë e partisë së tij”, deklaroi ai në emisionin “Info Nata”.

Muja theksoi gjithashtu se Kurti, pas rezultateve zgjedhore me mbi 50 për qind të votave, nuk ka nevojë politike për mbështetjen e Osmanit, pasi ajo nuk është pjesë e partisë së tij.

Profesori shtoi se do të ishte më e përshtatshme që në krye të shtetit të zgjidhet një president jopartiak.

Sipas tij, Osmani ka ndërtuar një profil të qartë politik gjatë kohës sa ka qenë presidente dhe pritet të vazhdojë të jetë aktive në politikë edhe në të ardhmen.

“Është më mirë me ardh një president jopartiak, Vjosa Osmani nuk është jopartiake. Ajo është partiake, gjatë gjithë kohës, herë si kryetare e shtetit. Një mënyrë ka punuar në krijimin e një profili të saj politik, ajo do të jetë në politikë, nuk do të shkojë në shtëpi”, deklaroi ai.