Kryeministri Kurti falënderon ekipet e kërkim-shpëtimit për gjetjen e trupit të Rrahim Latifit në Ujman

Kryeministri i Republikës së Kosovës, Albin Kurti, ka shprehur falënderimet e tij publike për të gjitha institucionet dhe organizatat që u angazhuan në operacionin e kërkimit në Liqenin e Ujmanit, që përfundoi me gjetjen e trupit të pajetë të Rrahim Latifit, 33-vjeçarit që dyshohej se kishte kërcyer nga ura para disa ditësh.

“Falënderoj Agjencinë e Menaxhimit të Emergjencave, Forcën e Sigurisë së Kosovës, Policinë e Kosovës, Shoqatën e Kosovës për Kërkim dhe Shpëtim, Klubin e Zhytjes ‘Trepça’ dhe KFOR-in për punën profesionale, përkushtimin e jashtëzakonshëm dhe angazhimin e pareshtur deri në gjetjen e trupit,” tha Kurti.

Ai gjithashtu u shpreh pranë familjes së të ndjerit:

“Familjes Latifi i shprehim ngushëllimet më të përzemërta dhe ju qëndrojmë pranë në këto momente të vështira për të ofruar gjithë mbështetjen tonë e për të ndarë me ta dhimbjen e madhe.”

Operacioni u zhvillua në veri të vendit, me pjesëmarrjen e FSK-së, ndërhyrje që u bë me pëlqimin paraprak të KFOR-it, siç kërkohet për çdo angazhim të Forcës në atë pjesë të territorit. Ngjarja ka tërhequr vëmendje të gjerë, përfshirë edhe reagime ndërkombëtare lidhur me ndjeshmërinë e zonës.