​Kryebashkiaku serb e vret me thikë të dashurën nga xhelozia, dënohet me 14 vjet burg

Drejtori i Departamentit të Administratës së Përgjithshme dhe Shërbimeve Publike të Komunës Koceleva në Serbi, Radovan Ranisavleviq (57), vrau të dashurën e tij Jasmina Puretiq Lazareviq (46) dhe më pas u përpoq të kryejë vetëvrasje.

Krimi i pasionit, i cili ndodhi më 23 shtator 2020, tronditi publikun dhe epilogu i gjykatës erdhi një muaj më parë. Motivi i vrasjes ishte xhelozia patologjike, raportojnë mediat serbe.

Ranisavleviq shkoi me veturë në urë mbi Sava pranë Shabacit me qëllim që t’i merrte jetën vetes. Ai u ndalua nga një patrullë policie që e gjeti në urë.

Ai i përshkroi policisë me detaje se si u ngjit në një shkallë deri te dritarja e shtëpisë së Jasminës, hyri brenda dhe pas një grindjeje të shkurtër e theri me thikë.

Policia shkoi në adresën në Bariq të Beogradit, rreth orës tre të mëngjesit, ku ata e gjetën trupin e pajetë të Jasmina Puretiq Lazareviq në një pellg gjaku, me plagë të shumta thike.

Një hetim në vendngjarje u krye dhe u sekuestruan gjurmë gishtash, ADN dhe prova të tjera materiale. Policia e Beogradit e mori Ranisavleviq në paraburgim, gjë që çoi në një hetim zyrtar.

Radovan dhe Jasmina, të dy të martuar me fëmijë të rritur, kishin filluar një histori dashurie të fshehtë pasi u takuan në fshatin e tyre të lindjes. Spekulohet se Jasmina vendosi t’i jepte fund lidhjes dhe të kthehej te familja e saj, gjë që Ranisavleviq, i fiksuar pas xhelozisë, nuk mund ta pranonte. Vetë Ranisavleviq në gjykatë pranoi krimin e kryer për të cilin u dënua me 14 vjet burg.