Kredia për sektorin privat në Shqipëri ka shënuar një rritje të fortë gjatë gjashtëmujorit të parë të vitit 2025, duke ruajtur të njëjtin trend pozitiv si në fund të vitit të kaluar. Sipas raportit të Bankës së Shqipërisë mbi tendencat e kreditimit, kjo ecuri është mbështetur nga kushtet financiare të favorshme dhe nga kërkesa e lartë për kredi.
“Në total, flukset neto të portofolit të kredisë në raport me PBB-në kanë mbetur në nivele të larta, gjë që është reflektuar në rritjen e raportit të kredisë për sektorin privat ndaj PBB-së, në 32.7%, duke e renditur Shqipërinë mes vendeve me rritjen më të shpejtë të kreditimit në rajon. Zgjerimi i kreditimit në ekonomi vijon të mbështetet nga kërkesa e lartë për financim nga sektori privat.”
Një tjetër element që spikat është dinamika e ndryshme mes bizneseve dhe individëve. Raporti vlerëson se kredia për individë është rritur me 17.4% në gjashtëmujorin e parë të vitit, duke shënuar një ndër nivelet më të larta historike.
“Bizneset e vogla kanë treguar përmirësim të ndjeshëm të normave të rritjes në kreditim, në 23%, ose rreth tre herë më shumë se mesatarja e vitit 2024. Bankat kanë zgjeruar financimin në sektorin e tregtisë, turizmit dhe industrisë, ndërsa ndërtimi ka shfaqur ngadalësim dhe bujqësia ka pësuar tkurrje të portofolit.”
Ky trend, sipas Bankës së Shqipërisë, pasqyron një ekonomi në zgjerim dhe një treg bankar më konkurrues, ku ofertat për individët dhe bizneset e vogla kanë qenë më të favorshme.
Tv Klan
Burimi: opinion.al
