Kryetari i Komunës së Butelit, Darko Kostovski, njoftoi se ka përfunduar rikonstruksioni i rrugës “Natanaill Kuçevishki”, një projekt që, sipas tij, realizohet pas plot katër dekadash.
Kostovski theksoi se nuk ka lejuar realizim jokualitativ të punimeve, duke bërë të ditur se kontraktori i parë është ndaluar dhe larguar nga projekti për shkak të cilësisë së papranueshme të punimeve.
Ai falënderoi banorët e rrugës për mirëkuptimin dhe durimin e treguar gjatë realizimit të projektit.
Sipas njoftimit, rikonstruksioni është realizuar në kohë rekord dhe ka përfshirë një sipërfaqe prej 3.000 metrash katrorë.
“Kjo është edhe një dëshmi e përmbushjes së premtimeve dhe një hap tjetër drejt përmirësimit të infrastrukturës rrugore në Komunën e Butelit”, ka deklaruar Kostovski.
Ai shtoi se besimi i qytetarëve do të justifikohet përmes punës në interes të tyre, ndërsa potencoi se ofensiva ndërtimore në komunë po vazhdon me dinamikë të fuqishme.
