Kryetari i Komunës së Butelit dhe kandidati i VMRO-DPMNE-së për mandatin e dytë, Darko Kostovski, ka prezantuar përmes një animacioni 3D projektin e ri kapital për ndërtimin e Shtëpisë së Kulturës dhe sheshit pranë kishës “Shën Jovan”. Sipas tij, për herë të parë Buteli do të ketë një shtëpi të vetën të kulturës, që do të bëhet simbol i jetës kulturore dhe argëtuese të komunës.
“Shtëpia e Kulturës do të shtrihet në dy nivele – kat dhe përdhes, me një sipërfaqe prej rreth 900 metra katrorë, ndërsa sheshi do të zërë një hapësirë prej 3.000 metra katrorë dhe do ta ndryshojë plotësisht pamjen e komunës sonë,” ka theksuar Kostovski, duke shtuar se projekti tashmë është përfunduar dhe është gati për zbatim.
“Ky është një nga projektet që qytetarët e Butelit e kanë pritur për shumë vite dhe tani më në fund do të bëhet realitet. Komuna e Butelit po zhvillohet dhe po ecën përpara,” përfundon Kostovski.
