Kryetari i komunës së Butelit dhe kandidati i VMRO-DPMNE-së për mandatin e dytë, Darko Kostovski, ka publikuar një video mesazh të fuqishëm në rrjetet sociale, duke prezantuar rezultatet konkrete të mandatit të tij katërvjeçar dhe duke shpallur vazhdimin e investimeve në infrastrukturë dhe zhvillim komunal.
“Ndërtuam 102 rrugë me vlerë prej 320 milionë denarësh! Po i ndryshojmë gjërat nga rrënjët për të siguruar kushte dinjitoze për jetesë për të gjithë qytetarët,” ka deklaruar Kostovski, duke theksuar se puna e tij është përqendruar në përmirësimin e jetës së çdo banori të Butelit.
Kostovski gjithashtu ka nënvizuar se investimet janë realizuar në zona që për dekada me radhë kanë qenë të lëna pas dore, ndërsa për herë të parë komuna ka përjetuar një zhvillim të tillë të shpejtë të rrugëve dhe infrastrukturës.
“Buteli është shtëpia jonë, e tashmja dhe e ardhmja jonë. Do të vazhdojmë, së bashku me ju, ta ndërtojmë dhe zhvillojmë Butelin në një vend modern dhe më të mirë për të jetuar,” ka theksuar Kostovski.
Në përmbyllje të postimit, Kostovski u ka bërë thirrje qytetarëve që në zgjedhjet e ardhshme lokale të votojnë për siguri dhe zhvillim të qëndrueshëm, të rrethojnë numrin 9 për një të ardhme të sigurt.
