Në Komunën e Butelit sot u shënua me solemnitet patronati i Shkollës Fillore “Petar Zdravkovski – Penko” në lagjen Shkup Veri. Kryetari i Komunës, Darko Kostovski, njoftoi se kjo ditë ka një rëndësi të veçantë jo vetëm për komunitetin arsimor, por për gjithë banorët e zonës.
Kostovski ka theksuar se gjatë periudhës së fundit në këtë shkollë janë realizuar shumë investime të rëndësishme, ndërsa aktualisht po vazhdon rekonstruksioni i fasadës energjetike, një projekt që synon përmirësimin e kushteve të mësimdhënies dhe krijimin e një ambienti më modern për nxënësit.
Kryetari i Butelit, Darko Kostovski gjithashtu ka vlerësuar shkollën fillore “Petar Zdravkovski – Penko” si një shembull të shkëlqyer të bashkëjetesës dhe raporteve të mira multietnike, ndërsa potencoi se komuna do të vazhdojë mbështetjen për ta ngritur këtë standard edhe më lart.
Në fjalën e tij, kryetari Kostovski kujtoi edhe figurën historike të Petar Zdravkovskit, i lindur më 4 nëntor 1912, një luftëtar i shquar i radhëve të NOB-it në pjesën perëndimore të Maqedonisë, emrin e të cilit sot mbart shkolla me krenari.
