Komuna e Butelit e nis vitin 2026 me masa konkrete në mbështetje të familjeve të reja. Kryetari i komunës, Darko Kostovski, ka bërë të ditur se për herë të parë është siguruar ndihmë financiare në vlerë prej 5.000 denarësh për çdo fëmijë të porsalindur në këtë komunë.
Sipas Kostovskit, kjo masë është pjesë e Programit për Mbrojtje Sociale për vitin 2026 dhe ka për qëllim përmirësimin e kushteve për familjet e reja në Butel. Ai theksoi se gjatë fushatës zgjedhore kishte premtuar ndihmë prej 3.000 denarësh, por falë menaxhimit të përgjegjshëm të buxhetit komunal, shuma është rritur në 5.000 denarë.
Kryetari i Butelit nënvizoi se komuna nuk do të ndalet me kaq, duke paralajmëruar investime të vazhdueshme në infrastrukturë dhe në përmirësimin e kushteve për fëmijët. Aktualisht, po ndërtohen dy çerdhe në Butel 1 dhe Butel 2, ndërsa në periudhën e ardhshme pritet ndërtimi edhe i tre çerdheve të reja në Radishan, Vizbeg dhe Butel 1.
“Vizioni ynë është i qartë, krijojmë kushte për zhvillim dhe një të ardhme më të mirë për çdo familje në Komunën e Butelit”, ka theksuar Kostovski.
