Drejtoria për Siguri dhe Emergjenca në Prishtinë, në bashkëpunim me Brigadën Profesionale të Zjarrfikësve, është aktualisht në terren dhe po intervenon në 8 lokacione të ndryshme për shkak të shpërthimeve të zjarreve.
Sipas një njoftimi të publikuar në Facebook, janë të angazhuar 40 zjarrfikës në operacion.
Drejoria për Siguri dhe Emergjenca ka bërë të ditur se lokacionet ku po ndërhyhet aktualisht janë: Rruga C, afër Maxi 24; Panari; Kosova B; Rimanishtë (2 raste); Trudë (3 raste); Milloshevë; Llukar (2 raste); Bardhosh.
Gjithashtu, është bërë thirrje për të shmangur lëvizjet në afërsi të zonave të prekura.
Në ditët e fundit është raportuar për dhjetëra zjarre në pjesë të ndryshme të Kosovës. Gjithashtu sot, më 26 korrik, në rrjete sociale janë shpërndarë video të ndryshme që treguan për zjarre.
Drejtori ekzekutiv i Agjencisë së Menaxhimit Emergjent, Genc Metaj, tha përmes një postimi në Facebook, se zjarrfikësit në të gjithë vendin janë duke intervenuar për të shuar zjarret.
“Ne këto momente, vendi po përballet me disa vatra te rrezikshme te zjarreve. Zjarrfikësit ne te gjithë vendin janë duke intervenu me vetëmohim për të lokalizuar dhe shuar zjarret. Terenet e vështira, paraqesin vështirësi për intervenim”.
Ai ka kërkuar nga qytetarët që të mos ndezin zjarre dhe të bashkëpunojnë me organet e rendit.
Burimi: botasot.info
