Shkupi do të jetë mikpritës i një ngjarjeje të veçantë kulturore më 10 shkurt 2026. Me iniciativë të Komunës së Çairit, në skenën e Operës dhe Baletit Nacional do të shfaqet për herë të parë për publikun e kryeqytetit opera e parë kosovare, “Goca e Kaçanikut”.
Vepra madhështore, e kompozuar nga Rauf Dhomi dhe me regji të mjeshtrit Nikolin Gurakuqi, do të interpretohet nga Kori dhe Orkestra e Operës së Kosovës. Kjo shfaqje konsiderohet si një nga ngjarjet më të rëndësishme kulturore të vitit, duke sjellë në Shkup artin operistik shqiptar në nivel të lartë artistik dhe duke bashkuar traditën, historinë dhe identitetin kulturor.
Shfaqja do të mbahet më 10 shkurt 2026, duke filluar nga ora 19:30, në ambientet e Operës dhe Baletit Nacional në Shkup dhe pritet të zgjojë interes tek publiku artdashës.
