Këshilli i Prokurorëve Publikë nuk zgjodhi drejtues të ri të Prokurorisë së Lartë Publike të Shkupit

Këshilli i Prokurorëve Publikë (KPP) nuk mori vendim për zgjedhjen e një kreu të ri të Prokurorisë së Lartë Publike të Shkupit në seancën e 40-të të sotme, pasi asnjë nga pesë kandidatët nuk mori shumicën e nevojshme. Në seancë, Këshilli shqyrtoi kandidaturat e Fatime Fetai, Vlladimir Miloshevski, Artan Ajro dhe Jasmina Kosteska-Zdravska. Kandidatura e kandidatit të pestë, Aleksandar Markovski, nuk u shqyrtua sepse ai ishte zgjedhur tashmë si prokuror publik në Prokurorinë Themelore Publike për Ndjekjen e Krimit të Organizuar dhe Korrupsionit (PTHP NKOK), transmeton Portalb.mk.

Në fillim të seancës, kryetari i Këshillit, Bashkim Selimi, informoi se shtatë kandidatë kanë aplikuar për shpalljen për zgjedhjen e një kreu të ri të Prokurorisë së Lartë Publike, dy prej të cilëve, Xhelal Bajrami dhe Trajçe Pelivanov, i tërhoqën kandidaturat e tyre.

Prokurori Publik i Shtetit Nenad Saveski tha se mbetet i përkushtuar për t’i dhënë të gjithëve një shans për të përparuar, duke treguar se do të votojë për Jasmina Kosteska-Zdravskën.

“Një prokurore me integritet dhe aftësi, dhe si person, ajo njihet në terren si pozitive dhe me qëllime të mira, të cilat janë karakteristika të rëndësishme për një pozicion udhëheqës”, tha Saveski.

Marjana Ilieska, zëvendëskryetare e Këshillit, tha se pajtohej me qëndrimin e Saveskit, duke shtuar se kjo u konfirmua edhe nga intervistat me kandidatët.

Ermon Neziri, kreu i Këshillit, votoi për prokuroren Fatime Fetai, duke theksuar se ajo është kandidatja me më shumë përvojë dhe më e përshtatshme për pozicionin.

Më 12 dhjetor të vitit të kaluar, Këshilli i Prokurorëve Publikë emëroi prokuroren Natasha Krstevska-Caleva si ushtruese detyre e Prokurorisë së Lartë Publike në Shkup.

Ajo do ta drejtojë këtë Prokurori deri në zgjedhjen e një drejtuesi të ri të kësaj prokurorie, por jo më gjatë se gjashtë muaj.

Mustafa Hajrullahi, u pezullua nga detyra dhe në një konferencë për media ka akuzuar se kallëzimi penal kundër tij nga prokurori publik republikan ka tendencë për ta larguar dhe heshtur, si dhe për të frikësuar edhe kolegët e tjerë që veprojnë në përputhje me ligjin, dhe të gjitha me qëllim, siç tha ai, për të marrë vendime të urdhëruara.

Vendimi për suspendimin e Hajrullahit erdhi pasi Prokuroria Themelore Publike Shtip kishte lëshuar urdhër për zhvillimin e procedurës hetimore ndaj tij, për të cilin ekziston dyshimi i bazuar se ka kryer veprën penale të vazhdueshme “ngacmimi gjatë kryerjes së detyrës” nga neni 143, si dhe vazhdimi i veprës penale të “keqpërdorimit të pozitës dhe autoritetit zyrtar” nga neni 353 i Kodit Penal.