Kërkohet program skriningu për zbulimin e hershëm të kancerit të gjirit

27

Shkup, 5 tetor – Pinkniku Rozë, i organizuar në nder të të gjitha grave që luftojnë me kancerin e gjirit dhe për mbështetje të atyre që përballen çdo ditë me këtë sëmundje, u mbajt sot në Parkun e Qytetit në Shkup nga shoqata HEMA-ONKO, e cila është e dedikuar për pacientët me kancer dhe kujdestarët e tyre, me mbështetje nga “Medicus Help”. Në këtë ngjarje morën pjesë gra nga disa qytete të vendit.

– Kemi shumë punë përpara. Ende nuk kemi bërë ndryshime të dukshme as në sistemin shëndetësor, as në Ligjin për Mbrojtje Shëndetësore, as në programet e skriningut, as në listën pozitive të barnave, madje as në mënyrën se si është organizuar onkologjia, pra në aspektin e shpërndarjes. E mira është që këtë vit patëm disa hapa përpara, sidomos për pacientet me kancer të gjirit, të cilat këtë vit e morën terapinë hormonale në barnatoret pranë shtëpive të tyre. Arritëm të përfshijmë në trajtim edhe një grup tjetër pacientesh me kancer trefish negativ, të cilat kanë karcinomë të varur nga gjenetika. Edhe këto paciente, që nuk janë më shumë se pesëdhjetë, këtë vit për herë të parë morën terapi që mund ta tërheqin në Klinikën e Onkologjisë – tha Ama Marjanoviq nga HEMA-ONKO.

Nga organizata theksuan se do të vazhdojnë të punojnë edhe më aktivisht për përmirësimin e trajtimit, parandalimit dhe rehabilitimit të pacientëve me kancer.

Marjanoviq përsëriti gjithashtu se pacientet për të cilat ka dyshime për kancer të gjirit nuk duhet të dërgohen në kirurgji, por në onkologji, se duhet të sigurohen borde tumorale, të krijohen ekipe multidisiplinare, si dhe të vendoset një program skriningu.

– Aktualisht në Maqedoni nuk ekziston një program skriningu i detyrueshëm dhe kjo është vërtet problem. Ne tashmë po negociojmë që ky program skriningu të bëhet i obligueshëm për të gjithë qytetarët nga mosha 40 deri në 69 vjeç, dhe gjithashtu të bëhet i detyrueshëm për mjekët amë, që ata të kujdesen për pacientet e tyre. Po negociohet me ekipet e radiologjisë për të gjetur mjaftueshëm termine – tha Marjanoviq.

Ajo shtoi se ky program skriningu duhet të jetë efikas, realist, të përfshijë të gjithë pacientët, të jetë afatgjatë dhe të japë rezultate reale.

– Nëse kanceri diagnostikohet në fazën zero ose në fazën e parë, të gjithë e dimë se prognozat janë të shkëlqyera dhe se këto paciente mund të vazhdojnë jetën e tyre sikur të mos e kishin kaluar kurrë këtë sëmundje – shtoi Marjanoviq.

Sipas saj, ekipet multidisiplinare tashmë janë në përgatitje.

HEMA-ONKO po përgatit gjithashtu një broshurë që do t’u shpërndahet të gjithë pacientëve të sapodiagnostikuar me kancer, e cila do të përmbajë të gjitha informacionet se ku duhet të drejtohen, çfarë duhet të bëjnë, këshilla për trajtimin dhe kimioterapinë, për pajisjet ndihmëse, ushtrimet për limfedemën etj.

Milica Kuzmanovska tha se në ngjarjen e sotme në Shkup morën pjesë paciente nga disa qytete të vendit, si Gostivari, Resnja, Vinca, Strumica dhe Sveti Nikole. Ajo falënderoi komunat që siguruan transport për pacientet.

– Këtë vit, me moton “Jemi të forta kur jemi bashkë”, deshëm të përcjellim një mesazh për të gjitha ato që aktualisht po trajtohen, të japim mbështetje për gratë më të reja, sepse kultura shëndetësore në vendin tonë është në nivel shumë të ulët. Të gjithë kanë frikë nga kontrollet dhe kjo duhet të ndryshojë – duhet të ketë parandalim, të ketë një program skriningu që funksionon. Përmes një ngjarjeje të tillë duam t’i bashkojmë të gjithë ata që janë të përfshirë në këtë temë, duam t’u tregojmë respekt atyre që humbën jetën, por të fokusohemi në diçka që mund të ndryshojë shumë gjëra në sistemin tonë shëndetësor – tha Kuzmanovska, duke theksuar se edhe rehabilitimi i pacientëve me kancer është shumë i rëndësishëm.