Kelly Clarkson ka shprehur mbështetjen e saj për përdorimin e Inteligjencës Artificiale në muzikë, duke e cilësuar teknologjinë si një mundësi të re për krijimtarinë artistike. Megjithatë, këngëtarja theksoi se IA nuk duhet të zëvendësojë elementin njerëzor në art.
Duke folur në podkastin “Las Culturistas”, Clarkson tha se është e apasionuar pas mundësive që ofron Inteligjenca Artificiale.
“Unë e dua Inteligjencën Artificiale. Ka gjëra të mahnitshme që mund të bëhen me të, me të cilat jam e fiksuar. Jam shumë e interesuar për të nga një këndvështrim artistik. Argëtohem me të si të gjithë të tjerët”, u shpreh ajo.
Megjithatë, këngëtarja bëri një dallim mes përdorimit të IA si mjet krijues dhe krijimit të artistëve tërësisht artificialë. Ajo tha se do të kishte problem nëse artistët e krijuar me IA do të konkurronin me muzikantët njerëzorë në të njëjtat lista muzikore.
“Kur shihni artistë të krijuar me IA që konkurrojnë me njerëzit në top lista, atëherë kam një problem. Mendoj se duhet të ketë një top të veçantë”, tha Clarkson.
Ajo e krahasoi këtë situatë me një garë sportive ku njerëzit do të përballeshin me robotë të projektuar për të pasur avantazhe maksimale.
Burimi: botasot.info
