KEK në prag të transformimit historik, Kurti: “Po ndërtojmë energjinë e të ardhmes”

Korporata Energjetike e Kosovës (KEK) po kalon një nga periudhat më të rëndësishme të transformimit në historinë e saj. Kryeministri i Kosovës, Albin Kurti, ka bërë të ditur se investimet në këtë ndërmarrje strategjike po tejkalojnë shifrën prej 500 milionë eurosh, me synimin që KEK-u të shndërrohet në një kompani moderne, të qëndrueshme dhe plotësisht në përputhje me standardet e Bashkimit Evropian.

Sipas Kurtit, projektet përfshijnë modernizimin e turbinave dhe investime të rëndësishme në njësitë B1 dhe B2, rehabilitimin e thellë të njësisë A3, si dhe investime madhore në termocentralet Kosova A dhe Kosova B. Një risi e veçantë është edhe hyrja e parë e KEK-ut në sektorin e energjisë së ripërtritshme, përmes ndërtimit të një parku solar.

Këto projekte konsiderohen thelbësore për sigurinë energjetike të vendit, stabilitetin ekonomik dhe zhvillimin afatgjatë. Me përfundimin e tyre, Kosovës pritet t’i shtohen rreth 150 megavat kapacitete shtesë në termocentralet ekzistuese, si dhe 100 megavat kapacitete të reja gjeneruese nga burimet e ripërtritshme.

Postimi i plotë:

Korporata Energjetike e Kosovës ndodhet në një moment historik transformimi. Investimet tejkalojnë 500 milionë euro, për ta bërë këtë ndërmarrje moderne, të qëndrueshme dhe në përputhje të plotë me standardet e Bashkimit Evropian.

Modernizimi i turbinave dhe investimet tjera në njësitë B1 dhe B2, rehabilitimi i thellë i njësisë A3, investimet madhore në termocentralet Kosova A dhe Kosova B, dhe hyrja për herë të parë e KEK-ut në sektorin e energjisë së ripërtritshme përmes parkut solar, janë tejet të rëndësishme për sigurinë energjetike të vendit, stabilitetin ekonomik dhe zhvillimin afatgjatë. Me përfundimin e këtyre projekteve, Kosovës do t’i shtohen rreth 150 MW kapacitete shtesë në termocentralet ekzistuese dhe 100 MW kapacitete te reja gjeneruese nga burimet e ripërtrishme.

Që nga 19 dhjetor i vitit që sapo lamë pas, KEK-u është duke prodhuar me kapacitetin maksimal të saj, me 5 njësi gjeneruese, në mënyrë që të kontribuojë në sigurinë e furnizimit në këto ditë të ftohta fundvitit dhe fillimvitit kur konsumi është i lartë.

Falënderoj punonjësit dhe menaxhmentin e KEK-ut për punën dhe profesionalizmin, dhe Bordin e Drejtorëve dhe Ministrinë e Ekonomisë për mbikëqyrjen e përkrahjen për KEK-un në këto projekte transformuese.

KEK-u sot po forcon themelet e energjisë së të ardhmes: një KEK më i fortë, më modern, më i sigurt dhe më i gjelbër, në shërbim të qytetarëve të Republikës së Kosovës dhe të brezave që vijnë.