Në prag të ndeshjes së rëndësishme mes KF Shkëndija dhe Qarabag, Kryetari i Komunës së Tetovës, Bilall Kasami, ka shprehur mbështetjen e tij të fuqishme për ekipin kuqezi, duke theksuar rolin e jashtëzakonshëm që luan Shkëndija në jetën kulturore dhe shpirtërore të qytetit dhe të gjithë shqiptarëve.
“SHKËNDIJA nuk është thjeshtë një ekip futbolli. Ajo është fryma e Tetovës, rrahja e zemrës sonë, krenaria e çdo shqiptari që e ndjen gjakun të vlojë kur valon flamuri kuqezi”, ka shkruar Kasami.
Ai ka bërë thirrje për mbështetje masive në stadium, duke theksuar se kjo ndeshje është më shumë se një sfidë sportive – është një moment për të dëshmuar se shqiptarët dhe Tetova përfaqësojnë vlera të larta sportive dhe europiane.
“Tetovarët dhe shqiptarët nuk mund të përdoren si ‘mish për top’, gjithmonë kur klane të caktuara politike të dështuar në mbrojtjen e vlerave shqiptare përpiqen të shkaktojnë tensione”, ka shtuar ai, duke dhënë një mesazh të qartë kundër instrumentalizimit të komunitetit shqiptar.
Kasami ka përfunduar postimin e tij me një urim për ekipin: “Urime e suksese SHKËNDIJA jonë!”, duke e quajtur klubin si “Shkëndija e vlerave sportive dhe e vlerave evropiane”.
Burimi: lajme24.mk
