Në një sallë të tejmbushur me përkrahës, VLEN sot në Shkup mbajti konventën promovuese, ndërsa kryetari i Tetovës, Bilall Kasami, solli një mesazh të fuqishëm mbi rrugëtimin politik të shqiptarëve në Maqedoninë e Veriut.
Në fjalimin e tij, Kasami rikujtoi momentin e vitit 2016, kur për herë të parë u shpalos ideja e ndryshimit përmes rinisë shqiptare.
“Shumëkush nuk na besoi, shumëkush na nënvlerësoi. Por ja ku jemi sot, me mijëra heronj që sollën ndryshimin e shumëpritur. Ju e mposhtët zullumin, e përmbysët një sistem të kalbur e të korruptuar dhe ndaluat pasurimin e individëve në kurriz të shqiptarëve”, tha Kasami.
Ai akuzoi partitë që për dy dekada kishin sunduar, duke i lënë shqiptarët vetëm me varfëri dhe raste të montuara politike.
Sipas tij, ndryshimi i madh i vitit 2024 ishte zëri i shqiptarëve që kërkuan dinjitet, ndërsa VLEN ishte vetëm shërbëtori i këtij zëri.
Kasami theksoi se përgjegjësia e VLEN është e madhe, por vullneti për ta çuar deri në fund betejën është edhe më i madh: “Siç e çliruam pushtetin qendror nga korrupsioni e abuzimi, ashtu do t’i çlirojmë edhe komunat tona”.
