Kapja e Maduros, diaspora venezueliane shpërthen në festime

Komunitetet venezueliane në mbarë botën kanë shpërthyer në festime pas njoftimit se presidenti i Venezuelës, Nicolas Maduro, është kapur nga forcat amerikane pas një operacioni ushtarak të zhvilluar në orët e para të mëngjesit.

Në Doral të Floridës, një nga qendrat më të mëdha të diasporës venezueliane në SHBA, qindra qytetarë u mblodhën duke gëzuar për largimin e Maduros.

Të veshur me ngjyrat e flamurit kombëtar, ata kënduan himnin e Venezuelës, valëviturën pankarta dhe festuan atë që e cilësuan si “ditë drejtësie”.

“Drejtësia po vihet në vend për të gjithë venezuelianët që u detyruan të largohen nga vendi për të mbijetuar,” u shpreh Kirvin Suarez, pjesëtar i komunitetit venezuelian në Doral.

Festime të ngjashme pati edhe në Santiago të Kilit, ku mijëra venezuelianë dolën në sheshe duke brohoritur “Liri” dhe duke valëvitur flamuj venezuelianë dhe amerikanë. Kili është një nga vendet me mbi 669 mijë shtetas venezuelianë.

Ndërkohë, qytetarët e Karakasit, pas një nate me shpërthime dhe të frikësuar për jetën, bëjnë thirrje për paqe.
Ata deklarojnë se është koha për një ndryshim pozitiv pas regjimit të Maduros.

Sipas të dhënave të Organizatës Ndërkombëtare për Migracionin, që nga viti 2000 rreth 7.7 milionë venezuelianë janë larguar nga vendi, shumica e tyre për shkak të kolapsit ekonomik dhe represionit politik gjatë qeverisjes së Maduros.