Kallas dhe Kos: Shqipëria përparim të rëndësishëm në rrugën drejt BE-së

Shqipëria ka shënuar përparim të rëndësishëm në rrugën drejt Bashkimit Evropian, sipas vlerësimit të fundit të Komisionit Evropian për procesin e zgjerimit, që pritet të publikohet zyrtarisht gjatë ditës së sotme.

Në një paraqitje paraprake në Parlamentin Evropian, komisionerja për zgjerimin e BE-së, Marta Kos, dhe shefja e politikës së jashtme të BE-së, Kaja Kallas, kanë dhënë një pasqyrë të gjetjeve kryesore të raportit të ri të zgjerimit.

Kos deklaroi se Shqipëria, Mali i Zi, Moldavia dhe Ukraina kanë bërë “përparime të rëndësishme në rrugën drejt BE-së”, duke theksuar se “reformat shpërblehen”.

“Mund të them se këta katër kandidatë i kanë përputhur ambiciet e tyre me veprime konkrete”, tha Kos.

Për Shqipërinë, Kos u shpreh se ka bërë “përparim të pashembullt gjatë vitit të kaluar”, duke vënë në dukje “angazhimin e fortë politik dhe aspiratat e qarta evropiane të shoqërisë shqiptare”.

Lidhur me Ukrainën, komisionerja Kos vlerësoi punën e bërë nga autoritetet e Kievit, por paralajmëroi për nevojën që “të ruhet vrulli dhe të parandalohet çdo rrezik kthimi pas, veçanërisht në luftën kundër korrupsionit”, duke iu referuar reformave antikorrupsion që u tentuan dhe u rrëzuan gjatë verës.

Vlerësimet zyrtare të Komisionit Evropian për vendet kandidate, përfshirë Shqipërinë, pritet të publikohen zyrtarisht pas më shumë se një ore, në konferencën e përbashkët të Kaja Kallas dhe Marta Kos në Bruksel.