Nga sot ka nisur gjysmëvjetori i dytë. Nxënësit janë kthyer në bankat shkollore. Pavarësisht rritjes së numrit të të prekurve nga gripi, institucionet kompetente kanë marrë vendim që mësimi të zhvillohet rregullisht, ndërsa kulmin e gripit e presin nga fundi i muajit. Ministrja e Arsimit u bëri apel prindërve që nxënësit të jenë të rregullt në shkollë dhe të mungojnë sa më pak, përveç rasteve kur shfaqin simptoma të gripit.
Në pjesën e dytë të vitit shkollor do të vazhdojë procesi i vendosjes së mësimit me një ndërrim, me të cilin deri më tani janë përfshirë rreth 200 shkolla. Në qershor, maturantët do të japin provimin e maturës shtetërore sipas konceptit të ri, në përputhje me llojin e arsimit.
