Këngëtarja britanike Jessie J ka ndarë publikisht një nga përvojat më të vështira dhe njëkohësisht më formësuese të jetës së saj. Ajo ka treguar se gjashtë muaj më parë iu nënshtrua një mastektomie në anën e djathtë, pasi u diagnostikua me kancer të gjirit në mars të vitit 2025. Ndërhyrja kirurgjikale u shoqërua edhe me vendosjen e një implanti, ndërsa Jessie e ka trajtuar situatën me sinqeritet dhe humor, duke theksuar se për momentin po i jep vetes kohë për shërim dhe pranueshmëri.
Por më e rëndësishmja për të, kjo përvojë i ka ndryshuar plotësisht këndvështrimin ndaj jetës. Jessie J thotë se prej asaj kohe ka hyrë në një fazë të re personale, ku ka mësuar të zgjedhë betejat e duhura, të mos shqetësohet për gjërat e vogla, të ngadalësojë ritmin dhe të jetë më e pranishme në moment. Ajo thekson rëndësinë e të shijuarit të jetës, të vepruarit sipas instinktit, largimit nga energjitë negative – qofshin ato nga miq, familjarë apo kolegë – dhe të qeshurit më shumë.
Këngëtarja shton se ka filluar të kujdeset më mirë për veten, si fizikisht ashtu edhe mendërisht, duke ngrënë më shëndetshëm dhe duke e dashur veten më shumë. Ajo e quan këtë periudhë “epokën e qëndrueshmërisë”, duke u shprehur thellësisht mirënjohëse për faktin që historia e saj mund të kishte përfunduar ndryshe.
Jessie J falënderoi organizatën Women’s Health UK për hapësirën dhe momentin e reflektimit, duke kujtuar se shëndeti i grave është kompleks dhe i shumëanshëm. Sipas saj, shëndeti nuk ka të bëjë vetëm me trupin, por edhe me mendjen, dhe me mënyrën se si njeriu përballet me sëmundjen dhe jetën në tërësi.
E mbushur me mirënjohje dhe forcë, Jessie J thotë se ndihet e bekuar dhe gati për vitin 2026, duke e quajtur vitin 2025 një vit që e ndryshoi përgjithmonë.
Burimi: botasot.info
