Rebelët Houthi dhe qeveria e njohur ndërkombëtarisht e Jemenit njoftuan të mërkurën se kishin arritur një marrëveshje për të rikuperuar dhe shkëmbyer eshtrat e të vdekurve të luftës, si pjesë e një marrëveshjeje më të gjerë për shkëmbimin e mijëra të burgosurve.
Palët, në luftë që nga viti 2014, njoftuan të martën se kishin arritur një marrëveshje për të shkëmbyer gati 3,000 të burgosur lufte, pas disa ditësh negociatash në Sulltanatin e Omanit.
“Një marrëveshje për rikuperimin dhe dorëzimin e trupave në të gjitha frontet u nënshkrua nga të gjitha palët, nën kujdesin e Kombeve të Bashkuara, Komitetit Ndërkombëtar të Kryqit të Kuq dhe Gjysmëhënës së Kuqe, shkroi në X Abdelkader al-Mourtada, një zyrtar në delegacionin Huthi përgjegjës për të burgosurit.
Sipas tij, iniciativa do të lejojë “të zbulohet fati i mijëra të zhdukurve nga të dyja palët”.
Majid Fadahil, një anëtar i delegacionit qeveritar të ngarkuar me negocimin e shkëmbimit të të burgosurve, i tha AFP-së se ky aspekt do të ishte një “shtojcë” e marrëveshjes së shkëmbimit dhe konfirmoi se ajo ishte nënshkruar dje në mëngjes.
Lufta civile në Jemen shpërtheu në vitin 2014, kur rebelët pushtuan kryeqytetin Sanaa. Një marrëveshje armëpushimi, e cila hyri në fuqi në vitin 2022, vazhdon të jetë në fuqi, megjithëse zgjatja e saj nuk është rënë dakord zyrtarisht kurrë.
Palët nuk sqaruan dje se kur do të ndodhte shkëmbimi i të burgosurve, megjithatë, nëse marrëveshja zbatohet, ajo do të jetë më e madhja që nga viti 2014.
I dërguari special i Kombeve të Bashkuara për Jemenin, Hans Grundberg, vlerësoi marrëveshjen, duke e quajtur atë “një hap të rëndësishëm dhe pozitiv që shpresojmë se do të lehtësojë vuajtjet e të burgosurve dhe familjeve të tyre në të gjithë Jemenin”.
Megjithatë, ai paralajmëroi në një deklaratë të lëshuar nga agjencitë e OKB-së se “zbatimi i saj efektiv do të kërkojë angazhimin dhe bashkëpunimin e qëndrueshëm të palëve, mbështetje të koordinuar rajonale dhe përpjekje të vazhdueshme për të ndërtuar mbi këtë progres me qëllim lirimin e mëtejshëm”.
Jemeni mbetet i ndarë në dy pjesë, me pjesën veriore të kontrolluar nga Houthit, një lëvizje aleate me Iranin, të cilët pushtuan kryeqytetin Sanaa dhe pjesën më të madhe të veriut në vitin 2014 dhe qeverinë e njohur ndërkombëtarisht, e cila bashkon forca të shpërndara dhe ka zhvendosur përkohësisht selinë e saj në Aden, në jug të vendit.
Kjo luftë e zhyti vendin më të varfër në Gadishullin Arabik në atë që OKB e përshkruan si një nga krizat më të këqija humanitare në planet.
Burimi: botasot.info
