Në një intervistë për Agjencinë Shtetërore të Lajmeve MIA, kandidati i Koalicionit VLEN për kryetar të Komunës së Çairit dhe njëherësh zëvendëskryeministër i parë dhe ministër i Mjedisit Jetësor dhe Planifikimit Hapësinor, Izet Mexhiti, zbuloi motivet që e shtynë të rikandidojë për udhëheqjen e komunës më të vogël për nga territori, por më të populluarën në Shkup.
Mexhiti me këtë rast ka theksuar se rrënjët e tij në Çair, ku ka lindur dhe është rritur, janë arsyeja kryesore që e bëjnë të kthehet me vendosmëri për të ofruar zhvillim të qëndrueshëm dhe vizionar.
“Ka një filozofi në politikë: të mos harrosh kurrë nga vjen. Unë vij nga Çairi, aty kam lindur e jam rritur, aty kam marrë mbështetje politike për vite me radhë. Sot, me mundësitë që ofron kjo qeveri e re, që historikisht është qeveria që më së shumti i ndihmon komunat në realizimin e investimeve kapitale dhe në zgjidhjen e problemeve konkrete të qytetarëve, kam vendosur të rikthehem dhe të japim një zhvillim strategjik për Çairin,” ka thënë Mexhiti në një intervistë për MIA.
Ai gjithashtu është shprehur se njohja e thellë e problemeve dhe mangësive të komunës, e kombinuar me përvojën e tij politike, e bëjnë të bindur se Çairi mund dhe duhet të shndërrohet në një komunë moderne, urbane dhe një vend shumë më i mirë për jetesë për qytetarët.
Sa i përket kritikave të kundërshtarit të tij kryesor, Bujar Osmani, Mexhiti u shpreh i qartë se këto zgjedhje nuk duhet të ngatërrohen me tema kombëtare, por të mbeten të përqendruara te problemet reale dhe te zgjidhjet lokale për qytetarët e Çairit.
