Zëvendëskryeministri i parë, Izet Mexhiti, ka shënuar sot fillimin e rikonstruksionit të kanalit atmosferik në Hasanbeg, një investim prej 38 milionë denarësh, i cilësuar si hap historik për sigurinë dhe jetën e banorëve.
“Hasanbegu nuk do të jetë më sinonim i dhimbjes, por i sigurisë dhe zhvillimit, ky është fillimi i një epoke të re”, tha Mexhiti, duke kujtuar se tragjedia e vitit 2016, kur humbën jetën 23 qytetarë nga përmbytjet, nuk duhet të përsëritet më kurrë.
Kanali, me gjatësi prej 1350 metrash dhe gjerësi deri në 10 metra, do të rikonstruktohet tërësisht, duke u shndërruar në mbrojtjen më të fortë kundër përmbytjeve.
Në ngjarje mori pjesë edhe kryetari i Kuvendit, Afrim Gashi, duke konfirmuar mbështetjen institucionale për projektin, që tashmë shihet si një kthesë për Hasanbegin, nga harresa dhe tragjedia, drejt sigurisë dhe zhvillimit.
