Shkup, 1 korrik – Me rastin e 4 Korrikut – Ditës së Pavarësisë së Shteteve të Bashkuara të Amerikës, zëvendëskryeministri i parë shqiptar në Qeverinë e Maqedonisë së Veriut, Izet Mexhiti, ka shprehur urimet e tij për këtë ditë historike, duke theksuar lidhjet e forta mes popullit shqiptar dhe SHBA-së, përcjell Zhurnal.mk.

Në një mesazh të shpërndarë publikisht, Mexhiti shkruan:

“Qoftë e përjetshme miqësia me SHBA-në! Urime Ditëlindja e 249-të!”

Ky urim vjen në një moment kur partneriteti strategjik mes Maqedonisë së Veriut dhe Shteteve të Bashkuara të Amerikës vazhdon të thellohet në sfera të ndryshme si siguria, zhvillimi demokratik, sundimi i ligjit dhe integrimi euroatlantik.

Mexhiti, i njohur për qëndrimet e tij të qarta pro-perëndimore, ka theksuar në vazhdimësi se kontributi i SHBA-së ka qenë vendimtar në ndërtimin e paqes dhe stabilitetit në rajon, si dhe në përkrahjen e aspiratave të shqiptarëve për barazi, drejtësi dhe zhvillim.

Bilall Kasami, Izet Mexhiti, Zeqirja Ibrahimi dhe Arben Fetai, përfaqësues të lartë të koalicionit VLEN, ishin të pranishëm në këtë ngjarje solemne, ku bashkë me përfaqësues të tjerë politikë dhe diplomatikë uruan ditëlindjen e aleatit më të rëndësishëm të shqiptarëve – Shteteve të Bashkuara të Amerikës.

Dita e Pavarësisë së SHBA-së u përkujtua në vend edhe përmes aktiviteteve të shumta diplomatike dhe festive të organizuara nga Ambasada Amerikane në Shkup.

Gëzuar 4 Korrikun – një aleancë që sfidon kohën dhe forcon të ardhmen!//Zhurnal.mk

Burimi: zhurnal.mk