Zëvendëskryeministri i parë dhe ministër i Ambientit Jetësor dhe Planifikimit Hapësinor, Izet Mexhiti, njëherësh dhe kandidat i koalicionit qeverisës VLEN për Komunën e Çairit, ka vazhduar takimet me qytetarët në kuadër të parafushatës për zgjedhjet lokale që do të mbahen në tetor të këtij viti.
Këtë herë, Mexhiti u prit në konakun e Abdulla Alilit-Dullës në Gazi Babë, ku zhvilloi një takim të sinqertë me banorët e kësaj lagjeje. Në fokus të diskutimeve ishin nevojat e përditshme të banorëve, kërkesa të cilat siç theksoi Mexhiti nuk janë abstrakte, por të matshme, të realizueshme dhe të domosdoshme për një standard më të mirë jetese.
“Banorët e Gazi Babës flasin qartë dhe pa ekuivokë. Ata kërkojnë projekte konkrete dhe zgjidhje reale, jo retorikë dhe premtime boshe. Pikërisht kjo mënyrë e të folurit është baza e angazhimit tonë, të kalojmë nga fjalët në zbatim,” është shprehur Mexhiti para të pranishmëve.
Sipas tij, kjo vizitë nuk ishte një ndalesë e zakonshme e fushatës, por një moment i rëndësishëm për t’i dhënë kahje energjisë dhe kërkesave të qytetarëve drejt veprimeve konkrete që do të sjellin ndryshime të prekshme për të gjithë.
