Iu përmend emri tek dosja Epstein, reagon ashpër Behgjet Pacolli: Do të nxjerrë faktet nga…

Lideri i AKR-së, Behgjet Pacolli në një postim të tij në facebook ka reaguar pasi iu përmend emri në ҫështjen Epstein.

Pacolli shkruan se është e shëmtuar kur përballet me fakte pabesie nga një njeri që i kishte besuar për 20 vite.

Ai thotë se faktet për këto pabesi do t’I nxjerrë një e nga një sapo të filloj trajtimi i tyre.

Postimi i plotë:

Gjëja më e shëmtuar është momenti kur njeriu përballet me faktet e pabesisë nga  “ njeriu “ të cilit i  kisha besuar pa masë, për më shumë se 20 vite.

Ndërkohë që çdo ditë po dalin faktet e reja , kjo pabesi  nuk ishte ndalur vetëm te mashtrimet apo falsifikimi i dokumenteve, por përfshinte edhe tentativa poshtërimi, vjedhje, përbuzje të sofres, gënjeshtra dhe shumë veprime të tjera të ulëta. As këto nuk i kishin mjaftuar. Ai duke mos pas fytyrë të përballët mẽ atë që kishte bërë, kishte vazhduar më tej, duke tentuar të rrënoj gjithçka që kam ndërtuar gjatë gjithë kohës së punës time , respektin ndaj njerëzve, moralin dhe pronën.

Faktet e këtyre pabesive, të ndërtuara me vite me radhë, do t’i publikoj një nga një sapo të fillojë trajtimi i tyre në gjykatat penale dhe civile në Kosovë, Shqipëri, Emirate dhe Libi – aty ku janë konsumuar.

Këto veprime janë aq të rënda, sa kam filluar t’i përmbledh faktet edhe në një libër, të cilin do ta promovoj gjerë e gjatë.

Me këtë synohen dy qëllime kryesore:

Së pari, të rritet vetëdija se pabesia është një akt i shëmtuar dhe nuk mund të kalojë pa pasoja.

Së dyti, për ata që mund të gjenden në një situatë të ngjashme me timen: besimi te njerëzit, sidomos te bashkëpunëtorët, është normal, por kontrolli është i domosdoshëm.