Ish ambasadori i Shqipërisë në Shkup, Arben Çejku, i është kundërpërgjigjur ashpër kryetarit të BDI-së, Ali Ahmeti, pas mesazhit të këtij të fundit në mbështetje të kryeministrit shqiptar, Edi Rama, në një kohë kur Shqipëria po përballet me protesta studentore që, sipas kontekstit të reagimit, prej gjashtë ditësh kërkojnë dorëheqjen e tij.
Në një koment në faqen zyrtare të Ahmetit, Çejku i ka kërkuar atij të mos vazhdojë të mbështesë Ramën, të cilin e cilëson si autokrat që po përpiqet të shpëtojë pushtetin dhe interesat personale.
“Zoti Ahmeti, të këshilloj si mik të mos vazhdoni të mbështesni një autokrat që po përgjak popullin e tij për karrigen e vet dhe interesat personale, sepse kjo është një njollë që do ju mbetet gjatë! Mbajeni përgjegjësinë për ato që përfaqësoni dhe kërkojini mikut tuaj Rama, ti thirrë mendjes e ndërgjegjes (nëse i ka mbetur ndoca) dhe të kuptojë se ka hyrë në rrugë pa krye!”, shkruan Çejku në reagimin e tij.
Çejku i ka bërë thirrje kreut të BDI-së të mbajë përgjegjësi për qëndrimet politike dhe të kërkojë nga Rama të reflektojë për situatën e krijuar në Shqipëri.
Çejku ka përdorur edhe një krahasim të drejtpërdrejtë me ish kryebashkiakun e Tiranës, Erion Veliaj, duke iu referuar “çelësit të Tiranës” që, sipas tij, Ahmeti ia kishte marrë Veliajt.
“Ju kujtoj se e morët “çelësin e Tiranës” nga lali Eri, por ti humbe zgjedhjet dhe ai shkoi në burg! Ta duash mëmëdheun, duhet të jesh realisht i paanshëm, sidomos në këto ditë të vështira që po kalon Shqipëria, përfundon Çejku.
